கண்ணூர் - இயற்கையும் கலாச்சாரமும் சங்கமிக்கும் பாரம்பரிய கேரள மாவட்டம்

கண்ணூர் என்ற தனது ஆங்கில உச்சரிப்பிலேயே பிரசித்தமாக அழைக்கப்படும் கண்ணனூர் கேரளாவின் வடக்குப் பகுதியிலுள்ள மாவட்டமாகும். இது செழுமையான கலாச்சாரம் மற்றும் பாரம்பரிய வேர்களை தன் அடையாளமாக கொண்டுள்ளது. மேற்குத்தொடர்ச்சி மலைகளுக்கும் அரபிக்கடலுக்கும் இடையில் பொதிந்துள்ள இப்பிரதேசமானது நிரம்பி வழியும் இயற்கை எழிலையும், தனித்தன்மையான - பாரம்பரிய கலாச்சார இயல்பையும் கொண்டு விளங்குகிறது. பண்டைய காலத்தில் மலபார் பிரதேசத்தின் வணிகக்கேந்திரமாக இந்த கண்ணூர் மாவட்டம் திகழ்ந்துள்ளது.



கண்ணூர் பகுதியின் செழிப்பான கலாச்சாரமானது பல்வேறு ராஜ்ஜியங்கள் இப்பகுதியில் கோலோச்சியதன் விளைவாக பிறந்துள்ளது. பைபிள் காலத்திலேயே சாலமன் மன்னரின் கப்பல்கள் இப்பகுதிக்கு வந்ததாக சொல்லப்படும் கதையிலிருந்து இப்பகுதியின் வரலாற்றுப்பின்னணி துவங்குகிறது.
டச்சுக்காரர்களின் தொடர்ச்சியான ஊடுறுவல்கள் மற்றும் போர்த்துகீசியர்கள், மைசூர் சுல்தான்கள், அவர்களைத் தொடர்ந்து ஆங்கிலேயர்கள் என பல ஆட்சியாளர்களின் தடங்கள் இப்பகுதியின் வரலாற்றில் ஆழப்பதிந்து சென்றிருக்கின்றன.

நாட்டுப்புறக்கதைகளும் கடற்கரைகளும்

நெசவுத்தறிகளுக்கும், புராணக்கதைகளுக்கும் புகழ் பெற்ற இந்த கண்ணூர் நகரமானது ‘தறிகளையும் கதைகளையும் கொண்ட நாடு’ எனும் பிரசித்தமான மலையாள வாக்கியத்தின் மூலம் அடையாளப் படுத்தப்படுகிறது.
இங்குள்ள நெசவுத்தொழில் பாரம்பரியமும், புராணிகக்கதைகள் மற்றும் கூத்துக்கலை வடிவங்களும் சர்வதேச அளவில் அறியப்படுகின்றன. தெய்யம் அல்லது தெய்யாட்டம் எனும் நாட்டுப்புற கூத்து வடிவம் இப்பகுதியின் முக்கிய ‘நிகழ்த்து கலை அம்ச’மாக பிரசித்தி பெற்றுள்ளது.
மேலும், கண்ணூரில் சுந்தரேஸ்வர் கோயில், கொட்டியூர் சிவன் கோயில், ஊர்பழசிகாவு கோயில், ஸ்ரீ மாவிலைக்காவு கோயில், ஸ்ரீ ராகவபுரம் கோயில், ஸ்ரீ சுப்ரமண்ய ஸ்வாமி கோயில் மற்றும் கிழக்கேகரா ஸ்ரீ கிருஷ்ணா கோயில் போன்ற புகழ் பெற்ற கோயில்கள் அமைந்துள்ளன.
இவை மட்டுமல்லாமல் கண்ணூர் பிரதேசத்தில் நீண்டு பரந்து கிடக்கும் மணற்பாங்கான கடற்கரைகள் பயணிகளுக்கு உல்லாசத்தையும் பொழுதுபோக்கையும் அளிக்கும் முக்கிய இயற்கை எழில் ஸ்தலங்களாக காட்சியளிக்கின்றன. இவற்றில் பய்யம்பலம் பீச், மீன்குண்ணு பீச், கீழுண்ண எழரா பீச் மற்றும் முழுப்பிளாங்காட் பீச் போன்றவை குறிப்பிடத்தக்க கடற்கரைகளாகும்.

சுவைகளின் பாரம்பரியம் மற்றும் கலாச்சாரத்தின் சுவை

கேரள வரலாற்றில் கண்ணூர் எனும் பெயருக்கு ஒரு முக்கியமான இடம் வழங்கப்பட்டிருப்பதை இங்குள்ள எண்ணற்ற பாரம்பரிய கட்டிடங்கள், நகரமைப்புகள் மற்றும் உணவுப்பாரம்பரியம் போன்றவற்றிலிருந்து எளிமையாக புரிந்துகொள்ளலாம்.
குண்டெர்ட் பங்களா, ஹோலி டிரினிட்டி கதீட்ரல் மற்றும் செயின்ட் ஆஞ்செலோ கோட்டை போன்றவை ஒருகாலத்தில் இப்பகுதியில் கோலோச்சிய காலனிய ஆதிக்கத்தின் மிச்சங்களாக காட்சியளிக்கின்றன.
கண்ணூரின் தனித்தன்மையான உணவுருசி மற்றும் தயாரிப்பு முறைகள் உணவுப்பிரியர்களை பெரிதும் ஈர்க்கும் சிறப்பம்சமாகவும் உள்ளது. தலசேரி தம் பிரியாணி எனும் உள்ளூர் உணவை இங்கு விஜயம் செய்யும் பயணிகள் மறக்காமல் ருசி பார்ப்பது நல்லது.
இது தவிர அறி உன்டா, நெய்பத்ரி, உன்னக்காயா, பழம் நிறச்சது, எலயாடா, களத்தப்பம் மற்றும் கிண்ணத்தப்பம் போன்ற பல ருசியான உணவுவகைகள் கண்ணூரின் விசேஷ உணவுப்பண்டங்களாக புகழ் பெற்றுள்ளன.
கண்ணூர் நகரம் இந்தியாவின் எல்லாப்பகுதிகளுடனும் நல்ல ரயில் மற்றும் சாலைப்போக்குவரத்து வசதிகளைக்கொண்டுள்ளது. கடற்கரைக்கு அருகில் அமைந்துள்ளதால் இனிமையான சூழலைக்கொண்டுள்ள இப்பிரதேசம் ஆண்டு முழுவதுமே பயணிகளை வரவேற்கும் இயல்புடன் காணப்படுகிறது.
ஏராளமான வெளிச்சுற்றுலா அம்சங்களையும், சாந்தம் தவழும் பழமையான அழகம்சங்களையும், செழுமையான கலாச்சார பாரம்பரியத்தின் வரலாற்றுத்தடங்களையும் கொண்டுள்ள கண்ணூர் எனப்படும் இந்த கண்ணனூர் நகரம் தன்னுள் பொதிந்துள்ள அதிசயங்களை தரிசிக்க சுற்றுலாப்பயணிகளை வரவேற்கிறது.

கேரளா

                                          

      

கேரளா

 தர்மதம் ஐலேண்ட், கண்ணூர்

தர்மதம் நகர நிலப்பகுதியிலிருந்து 100 மீட்டர் தள்ளி இந்த குறுந்தீவு அமைந்துள்ளது. 5 ஏக்கர் பரப்பளவில் அமைந்துள்ள இந்த தீவுத்திட்டு தென்னை மரங்கள் மற்றும் பசுமையான தாவரச்செழிப்புடன் காட்சியளிக்கிறது. பசுமைத்தீவு என்ற பொருத்தமான பெயரிலும் இது அழைக்கப்படுகிறது.
தர்மதம் தீவு தளசேரியிலிருந்து ஒரு சில கிலோ மீட்டர்கள் தூரத்திலுள்ள தர்மதம் நகரப்பகுதியில் அமைந்துள்ளது. முழுப்பிலான்காட் கடற்கரையிலிருந்து பார்த்தால் இந்த தீவு ஒரு வண்ண ஓவியம் போன்று காட்சியளிக்கிறது.
பிறந்த குழந்தை போன்ற இயற்கையின் தூய்மையுடன் ஒளிரும் இந்த தீவுப்பகுதிக்கு அலை இறக்கம் உள்ள நேரத்தில் நீரில் நடந்தே சென்றடைய முடியும். இருப்பினும் திடீரென்று அலைகள் உயரக்கூடிய வாய்ப்புள்ளதால் தகுந்த துணை மற்றும் பாதுகாப்பு அம்சங்களுடன் எச்சரிக்கையாக செல்வது அவசியம்.
மற்றும் ஒரு முக்கியமான தகவல் இந்த தீவு தனியாருக்கு சொந்தமானது என்பதாகும். எனவே தீவுக்கு செல்வதற்கு முன் அனுமதி பெறவேண்டியுள்ளது.


எழிமலா, கண்ணூர்

290 மீட்டர் உயரத்தில் அமைந்திருக்கும் மலைகளின் தொகுப்பான இந்த எழிமலா தன் மரகதப்பச்சை போன்ற ரம்மியமான இயற்கை வனப்பால் சுற்றுலாப்பயணிகளை வசியப்படுத்துகிறது.
பண்டைக்காலத்தில் மூஷிகா ராஜவம்சத்தின் தலைநகராக விளங்கிய வரலாற்றுப்பின்னணியையும் இது கொண்டுள்ளது. பழமை வாய்ந்த துறைமுகமாவும் விளங்கிய இந்த மலைப்பகுதிக்கு புத்த பஹவான் விஜயம் செய்துள்ளார் என்பதும் குறிப்பிடத்தக்கது.
இந்த மலைப்பகுதியின் தோற்றமானது ராமாயண காவியத்தில் விவரிக்கப்ப்டும் சில சம்பவங்களுடன் தொடர்புகொண்டுள்ளதாக ஐதீக நம்பிக்கைகள் நிலவுகின்றன.
இப்பகுதியில் பிரசித்தமான ஒரு அனுமான் கோயிலும், மவுண்ட் டெலி எனப்படும் ஒரு கலங்கரை விளக்கமும் முக்கியமான சுற்றுலா அம்சங்களாக அறியப்படுகின்றன. இந்தியக்கடற்படையின் கட்டுப்பாட்டில் உள்ள இந்த எழிமலா பிரதேசம் 2009ம் ஆண்டில் இந்திய கடற்படை கல்வி மையம் இங்கு துவங்கப்பட்டதிலிருந்து பாதுகாக்கப்பட்ட வளாகமாகவும் அறிவிக்கப்பட்டுள்ளது.
கண்ணூர் நகரத்திலிருந்து 55 கி.மீ தூரத்தில் உள்ள இந்த எழிமலா பகுதியின் பாதுகாக்கப்பட்ட பகுதிகளை விஜயம் செய்ய உரிய அதிகாரிகளிடம் முன் அனுமதி பெறுவது அவசியமாகும்.
இங்குள்ள கடற்கரை அமைதியான சூழல் மற்றும் இயற்கை அழகோடு காட்சியளிப்பது குறிப்பிடத்தக்கது. எட்டிக்குளம் வளைகுடாப்பகுதியும் இப்பகுதிக்கு அருகிலேயே அமைந்துள்ளது. இந்த வளைகுடாப்பகுதியில் பயணிகளுக்கு டால்பின்களை பார்த்து ரசிப்பதற்கான வாய்ப்பும் காத்திருக்கிறது.

ஃபோர்ட் செயிண்ட் ஆஞ்செலோ, கண்ணூர்

கண்ணூர் கோட்டை என்று பிரபலமாக அறியப்படும் இந்த ஃபோர்ட் செயிண்ட் ஆஞ்சலோ கண்ணூர் நகரத்திலிருந்து 3 கி.மீ தொலைவில் அமைந்துள்ளது. சுற்றியுள்ள இயற்கைக்காட்சிகளை பார்த்து ரசிப்பதற்கேற்ற காட்சித்தளமாய் விளங்கும் இக்கோட்டை ஆரவாரிக்கும் அரபிக்கடலை நோக்கியவாறு எழுப்பப்பட்டுள்ளது.



இந்தியாவின் முதல் போர்த்துகீசிய வைசிராய் என்று அறியப்படும் டாம் ஃப்ரான்சிஸ்கோ டீ அல்மெய்ட் என்பவரால் 1505ம் ஆண்டு இந்த கோட்டை கட்டப்பட்டுள்ளது. இது எதிரிகளின் முற்றுகையிலிருந்து இப்பகுதியை பாதுகாக்கும் விதத்தில் உறுதியான அரண் போன்று நிர்மாணிக்கப்பட்டிருக்கிறது.
பின்னாளில் டச்சுக்காரர்கள் மற்றும் ஆங்கிலேயர்களால் கைப்பற்றப்பட்டபின் சில புதுப்பிப்புகளும் இக்கோட்டையின் அமைப்பில் செய்யப்பட்டுள்ளது. இந்தியா சுதந்திரம் பெறும் வரை இக்கோட்டை ஆங்கிலேயப் படைத்தளமாகவும் விளங்கியுள்ளது.
இன்று கண்ணூர் கோட்டை இந்தியத்தொல்லியல் துறையினரால் பாதுகாக்கப்படும் வரலாற்றுச் சின்னங்களில் ஒன்றாக விளங்குகிறது. கண்ணூர் பிரதேசத்தின் வரலாற்றுப் பின்னணியோடு நெருங்கிய தொடர்புடையதால் இந்த கோட்டை ஏராளமான சுற்றுலாப்பயணிகளை கவர்ந்திழுக்கிறது.
இந்த கோட்டை எல்லா நாட்களிலும் திறந்துள்ளது.
பார்வை நேரம்: காலை 8 மணி முதல் மாலை 6 மணி வரை
நுழைவுக்கட்டணம்: இலவச அனுமதி

பய்யம்பலம் பீச், கண்ணூர்

பய்யம்பலம் பீச் எனப்படும் ரம்மியமான வெண்மணற்பரப்பைக்கொண்ட இந்த கடற்கரை கண்ணூர் பிரதேசத்தின் முக்கியமான சுற்றுலா அம்சமாகும். கண்ணூர் நகரத்திலிருந்து 2 கி.மீ தூரத்தில் உள்ள இந்த கடற்கரையை சாலை மார்க்கமாக எளிதில் வந்தடையலாம்.

Image source:commons.wikimedia.org

தங்கநிறக்கதிர்களை சிதறடித்தபடியே சூரியன் அஸ்தமிக்கும் காட்சியை இந்த கடற்கரையில் கண்டு ரசிப்பதற்காக ஏராளமான பயணிகள் விஜயம் செய்கின்றனர். புத்துணர்ச்சியூட்டும் இந்த தரிசனம் பார்வையாளர்களின் மன அலுப்புகளை போக்கி உற்சாகப்படுத்துகிறது.
பய்யம்பலம் பீச் கடற்கரையின் முக்கியமான கவர்ச்சி அம்சமாக தாயும் சேயுமாக வடிக்கப்பட்டுள்ள ஒரு சிலை பார்வையாளர்களை கவரும் விதத்தில் அமைக்கப்பட்டுள்ளது.
மலம்புழாவிலுள்ள புகழ்பெற்ற யக்ஷி சிலையை வடித்த புகற்பெற்ற சிற்பி கானாயி குஞ்சிராமன் என்பவரால் இந்த சிலை வடிக்கப்பட்டுள்ளது. அலங்கார தோட்டத்தின் நடுவில் பிரம்மாண்டமாக காட்சியளிக்கும் இந்த சிலை பயணிகளை கவரும் அம்சமாக பிரசித்தி பெற்றுள்ளது.
இந்த கடற்கரையை ஒட்டியே நன்கு பராமரிக்கப்பட்ட பூங்காத்தோட்டம் ஒன்றும் காணப்படுகிறது. பயணிகள் இந்த பூங்காத்தோட்டத்தில் அமர்ந்து ஆர்ப்பரிக்கும் அலைகள் நிறைந்த அரபிக்கடலை ரசித்துக்கொண்டிருக்கலாம்.
ஸ்வதேஷாபிமானி ராமகிருஷ்ண பிள்ளை, பாம்பம் மண்டவன், ஏ.கோ.கோபாலன் மற்றும் கே.ஜி. மாரார் போன்ற பிரபல்யமான சமூகத்தலைவர்களின் சமாதிகளும் இந்த கடற்கரையில் அமைந்துள்ளன.
தூய்மையான மற்றும் குடும்பத்தினருடன் நேரத்தை கழிப்பதற்கேற்ற பாதுகாப்பான சூழலை கொண்டிருப்பது இந்த கடற்கரையின் விசேஷ அம்சமாகும்.

தெளிசேரி கோட்டை, கண்ணூர்

தெளிசேரி கோட்டை அல்லது தலசேரி கோட்டை என்று அழைக்கப்படும் இந்த கோட்டை வரலாற்று முக்கியத்துவம் வாய்ந்த ஒரு சரித்திர ஞாபகார்த்த சின்னமாகும். இது கண்ணூர் நகரத்திலிருந்து 22 கி.மீ தூரத்தில் தலசேரி நகரத்தில் சுலபமாக சாலை மார்க்கமாக சென்றடையும்படி அமைந்துள்ளது. கிழக்கிந்திய கம்பெனியாரால் 1708ம் ஆண்டில் கட்டப்பட்டுள்ள இக்கோட்டை மிக நீண்ட காலனிய ஆதிக்கத்தின் சான்றாக காட்சியளிக்கிறது

Image source:www.wikipedia.org

முழப்பிளாங்காட் கடற்கரையில் ஒரு குன்றின் உச்சியில் இந்த கோட்டை எழுப்பப்பட்டுள்ளது. ஆங்கிலேயர் ஆட்சியின்போது முக்கியமான ராணுவ படைக்கேந்திரமாக இந்த கோட்டைபகுதி பயன்படுத்தப்பட்டுள்ளது.
கோட்டையின் அடித்தளமானது பிரம்மாண்டமான லாடரைட் கற்களைக்கொண்டு உருவாக்கப்பட்டுள்ளது. உயர்ந்தோங்கி நிற்கும் கோட்டைச்சுவர்கள் மற்றும் மர வேலைப்பாடுகள் கொண்ட கதவுகள், அரபிக்கடலை நோக்கி செல்லும் ரகசிய சுரங்கப்பாதைகள் என்று பல நுட்பமான அம்சங்களைக்கொண்ட இந்த கோட்டையானது பார்வையாளர்களை முதல் பார்வையிலேயே தன் பிரம்மாண்டத்தால் பிரமிக்க வைத்துவிடுகிறது.
இன்று தலசேரி கோடை ஒரு முக்கியமான சுற்றுலா அம்சமாக இந்திய தொல்லியல் துறையினரால் பாதுகாக்கப்பட்டு நிர்வகிக்கப்படுகிறது. ஒரு புராதன ஆங்கிலிகன் தேவாலயம், ஆங்கிலேய அதிகாரிகள் புதைக்கப்பட்ட சமாதித்தோட்டம் மற்றும் வெல்லஸ்லி பங்களா போன்ற இதர முக்கியமான அம்சங்களையும் இந்த கோட்டை வளாகத்துக்கு அருகேயே பயணிகள் பார்க்கலாம்.
பார்வை நேரம்: காலை 8 மணி முதல் மாலை 6 மணி வரை
நுழைவுக்கட்டணம்: ஏதுமில்லை

அரக்கல் கெட்டு, கண்ணூர்

தற்போது ஒரு அருங்காட்சியகமாக மாற்றப்பட்டுள்ள இந்த அரக்கல் கெட்டு எனும் அரண்மனை தன் வரலாற்று மற்றும் ராஜரீக அரும் பொருள் சேகரிப்புகள் மூலம் பயணிகளை ஈர்க்கிறது.

Image source:commons.wikimedia.org

கண்ணூர் நகரத்திலிருந்து ஒரு சில கிலோ மீட்டர் தூரத்தில் உள்ள இந்த அரண்மனை மொப்பிளா வளைகுடாவுக்கு அருகிலேயே உள்ளது. ஒரு சில நூற்றாண்டுகளுக்கு முன்பு இது கண்ணூர் மற்றும் லட்சத்தீவு பகுதிகளை ஆண்ட அரக்கல் அலி ராஜ வம்சத்தினர் வசித்த மாளிகையாக திகழ்ந்துள்ளது.
லாடரைட் கற்கள் மற்றும் வேலைப்பாட்டு கடைசல்கள் நிரம்பிய மர அமைப்புகளால் உருவாக்கப்பட்டுள்ள இந்த அரண்மனையானது கேரளப்பிரதேச மற்றும் பழங்கால ஐரோப்பிய கலையம்சங்களை கலந்து உருவாக்கப்பட்டுள்ளது.
ஒரு விசாலமான உள்முற்றம், பல்வேறு உள்கட்டு மாளிகைகள், மசூதிகள், நீளமான கூடங்கள், சபை மண்டபங்கள், மரத்தரைகள் மற்றும் கண்ணாடி அலங்காரங்களை கொண்ட ஜன்னல்கள் ஆகியவை இந்த அரண்மனையின் சிறப்பம்சங்களாக காணப்படுகின்றன.
இந்த அரண்மனையின் தர்பார் மண்டபமானது கேரள அரசாங்கத்தால் ஒரு அருங்காட்சியகமாக மாற்றப்பட்டுள்ளது. இருப்பினும், இந்த ஒட்டுமொத்த அரண்மனை வளாகமும் இன்னும் அரக்கல் ராஜவம்சத்தாரின் உரிமை மற்று நிர்வாகத்தின் கீழ் உள்ளது குறிப்பிடத்தக்கது.
இந்த அரண்மனையை சுற்றிப்பார்ப்பதற்கு ஒரு சிறிய கட்டணமும் அரக்கல் ராஜகுடும்ப அறக்கட்டளையால் வசூலிக்கப்படுகிறது. இங்குள்ள அருங்காட்சியகத்தில் ராஜ குடும்பத்தினர் பயன்படுத்திய பலவிதமான பொருட்கள் காட்சிக்கு வைக்கப்பட்டுள்ளன.
இவற்றில் ராஜமுத்திரைகள், தானிய மரக்களஞ்சியங்கள், புனித குரான் நூற்பிரதி, ஒரு புராதன தொலைபேசி, வாள்கள், பித்தளை மற்றும் வெள்ளி பாத்திரங்கள், குறுவாட்கள், இருக்கைகள் மற்றும் ஒரு தொலைநோக்கி ஆகியவை குறிப்பிடத்தக்க பொருட்களாகும்

செறுகுண்ணு, கண்ணூர்

செறுகுண்ணு எனும் இந்த சிறுநகரம் கண்ணூர் நகரத்திலிருந்து 20 கி.மீ தூரத்தில் உள்ளது. இது ஒரு முக்கியமான ஆன்மிக ஸ்தலமாக அறியப்படுகிறது. செறுகுண்ணு எனும் பெயருக்கு மலையாளத்தில் சிறிய மலை என்பது பொருளாகும். இந்நகரத்தை சுற்றிலும் சிறிய மலைகள் அதிகமாக காணப்படுவதால் இப்பெயர் வந்துள்ளது.

Image source:commons.wikimedia.org

செறுகுண்ணு பகுதியில் ‘துருத்துகள்’ எனப்படும் ஏராளமான குட்டித்தீவுகளும் அமைந்துள்ளதால் இப்பிரதேசம் பிரமிப்பூட்டும் இயற்கை எழிலுடன் காட்சியளிக்கிறது. தவம் சர்ச் (புராதன ரோமன் கத்தோலிக்க தேவாலயம்), ஒலியங்கரா ஜுமா மஸ்ஜித் (சூஃபி சமாதி ஸ்தலம்) மற்றும் செயிண்ட் மார்ட்டின் டே போரஸ் ஹாஸ்பிடல் (மிஷன் ஹாஸ்பிடல்) போன்றவை இந்நகரத்தின் முக்கிய கவர்ச்சி அம்சங்களாகும்.
அன்னபூரணீஸ்வரி கோயில் அல்லது செறுகுன்னிலம்மா கோயில் என்றழைக்கப்படும் கோயில் செறுகண்ணு நகரத்தில் பக்தர்களும் பயணிகளும் அதிகம் விஜயம் செய்யும் ஸ்தலமாக காணப்படுகிறது.
இந்தியாவின் அன்னபூரணி தேவிக்காக உருவாக்கப்பட்டுள்ள ஒருசில கோயில்களில் இதுவும் ஒன்றாகும். உணவுக்கான பெண் தெய்வத்துக்காக நிர்மாணிக்கப்பட்டுள்ள இக்கோயிலில் அன்னதான சடங்கு பிரசித்தமாக நடத்தப்படுகிறது.

கிழக்கேகரா ஸ்ரீ கிருஷ்ணா கோயில், கண்ணூர்

கிழக்கேகரா ஸ்ரீ கிருஷ்ணா கோயில் எனப்படும் இந்த புராதனமான கிருஷ்ணர் கோயில் 3000 ஆண்டுகள் பழமை வாய்ந்ததாக நம்பப்படுகிறது. கண்ணூர் நகரத்திலிருந்து 7 கி.மீ தூரத்தில் உள்ள சிரக்கல் எனும் இடத்தில் இந்த கோயில் அமைந்துள்ளது.
பல நூற்றாண்டு கால வரலாற்றைக் கொண்டுள்ள இந்த கோயில் வரலாற்றுப்பிரியர்களும் தொல்லியல் வல்லுனர்களும் விரும்பி விஜயம் செய்யும் ஒரு ஸ்தலமாக பிரசித்தி பெற்றுள்ளது. இக்கோயிலில் பாதுகாக்கப்படும் ஏட்டுப்பிரதிகள் 2500 ஆண்டுகள் பழமையானதாக இருக்கலாம் என்று இந்திய தொல்லியல் துறையினரால் கணக்கிடப்பட்டுள்ளது.
இந்த கோயிலில் மிக அரிதான பால கோபால ரூபத்தில் ஸ்ரீ கிருஷ்ணர் காட்சியளிக்கின்றார். 5 ஏக்கர் பரப்பளவில் காட்சியளிக்கும் மிகப் பிரம்மாண்டமான சிரக்கல் குளத்துக்கு அருகிலேயே இந்த கிருஷ்ணர் கோயில் அமைந்துள்ளது.
சிரக்கல் ராஜவம்சத்தாரின் குலக்கோயிலாக விளங்கிய இந்த கோயிலில் அன்னதானம் போன்ற முக்கிய சடங்கு நிகழ்ச்சிகள் நடத்தப்பட்டுள்ளன. அமைதியான சூழலையும் தெய்வீக பிரகாசத்தையும் பெற்றுள்ள இந்த ஸ்தலம் பயணிகளின் மனதை சாந்தப்படுத்தி ஆன்மீக சக்தியை அளிக்கும் இயல்புடன் விளங்குகிறது.

கொட்டியூர் சிவன் கோயில், கண்ணூர்

வட கேரளத்தின் முக்கிய ஆன்மீகத்தலங்களாக விளங்கும் அக்கரே கொட்டியூர் கோயில் மற்றும் இக்கர கொட்டியூர் கோயில் இரண்டும் கொட்டியூர் சிவன் கோயில் என்ற பெயரில் அழைக்கப்படுகின்றன.

Image source:commons.wikimedia.org

இந்த கோயில்கள் கொட்டியூர் எனும் சிறுகிராமத்தில் அமைந்துள்ளன. தக்ஷிண காசி (தென்னிந்தியாவின் காசி) என்ற சிறப்புப்பெயரை இந்த கொட்டியூர் பெற்றுள்ளது. அக்கரே கொட்டியூர் பவலி ஆற்றின் கிழக்குக்கரையிலும் மற்றும் இக்கரெ கொட்டியூர் மேற்குக்கரையிலும் அடர்ந்த வனப்பகுதிக்குள் மத்தியில் அமைந்துள்ளன.
மே மற்றும் ஜூன் மாதத்தில் வைசாக திருநாள் இக்கோயிலில் சிறப்பாக கொண்டாடப்படுகிறது. 28 நாட்களுக்கு தொடர்ந்து நடத்தப்படும் இந்த திருவிழாவின் சடங்குகளிலும் பூஜைகளிலும் கலந்துகொள்ள லட்சக்கணக்கான பக்தர்கள் திரண்டு வருகின்றனர்.
இளநீர் வெப்பு மற்றும் இளநீராட்டு போன்ற முக்கியமான சடங்குகள் அச்சமயம் நிறைவேற்றப்படுகின்றன. கொட்டியூர் சிவன் கோயிலை சுற்றுலாப்பயணிகள் கண்ணூர் (70 கி.மீ) அல்லது தலசேரி (60 கி.மீ) நகரிலிருந்து சென்றடையலாம்.

பேரளசேரி, கண்ணூர்

பேரளசேரி எனும் இந்த சிறுநகரம் கண்ணூர் நகரத்திலிருந்து 14 கி.மீ தூரத்தில் உள்ளது. கண்ணூர் –கூத்துபரம்பா நெடுஞ்சாலையில் அமைந்துள்ள இந்த நகரத்தை சாலைமார்க்கமாக சுலபமாக சென்றடையலாம்.

Image source:commons.wikimedia.org

பேரளசேரியின் முக்கியமான சுற்றுலா அம்சமான சுப்ரமணியா கோயில் கேரளா மாநிலத்தின் எல்லாப்பகுதிகளிலிருந்தும் பக்தர்களை ஈர்க்கிறது. சீதாதேவியை தேடி இலங்கை நோக்கி செல்லும்போது ராமபிரான் தன் தம்பி லட்சுமணனுடன் இந்த கோயிலில் வழிபட்டதாக ஐதீகக்கதைகள் சொல்லப்படுகின்றன.
முருகக்கடவுளுக்கான இந்த சுப்ரமண்யா கோயிலில் தாமிரம் மற்றும் வெண்கலத்தால் ஆன பாம்புச்சிலைகள் பிரசித்தமான அம்சங்களாக காட்சியளிக்கின்றன. இந்தக்கோயிலில் அமைந்துள்ள ஒரு பிரம்மாண்டமான படிக்கிணறு(குளம் போன்ற அமைப்பு) தென்னிந்தியாவிலுள்ள ஒரு முக்கியமான கட்டிடக்கலை அம்சமாகும்.
பிரமிக்க வைக்கும் இந்த கிணற்றின் தோற்றம் ராஜஸ்தானிய படிக்கிணறுகளை ஒத்திருக்கிறது. சீத்தங்கன் துள்ளல், சாக்யார்கூத்து, ஒட்டன்துள்ளல், கதகளி போன்ற பரவசமூட்டும் கேரள பாரம்பரிய நாட்டார்கலை நிகழ்ச்சிகளை இந்த கோயிலின் திருவிழாக்காலங்களில் கண்டு களிக்கலாம். இக்கோயிலுள்ள பாம்புத்தெய்வங்களுக்கு முட்டையை நைவேத்தியமாக வழங்கும் ‘முட்ட ஒப்பிக்கல்’ எனும் சடங்கு பின்பற்றப்படுகிறது.